माय अहमदनगर वेब टीम
अहमदनगर : महाविकास आघाडीचे जागा वाटप निश्चित होण्याआधीच शिवसेना उध्दव बाळासाहेब ठाकरे यांनी उमेदवार जाहीर केल्याने काँग्रेसने नाराजी व्यक्त केली. ज्येष्ठ नेते बाळासाहेब थोरात यांनीही नाराजी व्यक्त करून फेरविचाराची मागणी केली. असाच विरोध शिर्डी मतदारसंघात भाऊसाहेब वाकचौरे यांच्या उमेदवारीला होत आहे. पदाधिकारी यांनी नाराजी व्यक्त केली असून बंडाळीचा झेंडा हाती घेतला आहे.
शिर्डी मतदारसंघातून काँग्रेसकडून इच्छूक असलेल्या उत्कर्षा रुपवते बंडाच्या तयारीत असल्याचे दिसते. तर दुसरीकडे शिवसेना उद्धव बाळासाहेब ठाकरे पक्षाचे जिल्हा समन्वयक अशोक गायकवाड यांनी वाकचौरेंना उमेदवारी जाहीर होताच मातोश्री गाठून नाराजी व्यक्त केली. पक्षप्रमुख उद्धव ठाकरे यांची भेट घेत वाकचौरे यांना शिर्डीतून विरोध असल्याचे त्यांनी ठाकरे यांच्या लक्षात आणून दिले. त्यावर ठाकरे यांनी शिष्टमंडळाची समजूत काढून ‘आपला निर्णय झाला आहे, आता फैसला साईबाबांवर सोपवू,’ अशा शब्दांत विषय संपविल्याचे गायकवाड यांनी सांगितले.
शिर्डीतून वाकचौरे यांचे नाव पुढे आले तेव्हापासूनच विरोध सुरू झाला होता. शिवाय बौद्ध समाजाला संधी द्यावी, अशीही मागणी पुढे आली होती. मात्र, पक्षाकडून वाकचौरे यांचीच उमेदवारी जाहीर करण्यात आली. त्यावर समन्वयक गायकवाड, उत्तर जिल्हा प्रमुख रावसाहेब खेवरे यांनी तडक मातोश्री गाठून ठाकरे यांची भेट घेतली. वाकचौरे यांच्याबद्दलचे नागरिकांचे मत, वयोमानानुसार त्यांच्या मर्यादा, बौद्ध समाजाची मागणी या गोष्टी त्यांनी ठाकरे यांच्या निदर्शनास आणून दिल्या. अजूनही वेळ गेलेली नाही. उमेदवारी अर्ज दाखल करण्यासाठी महिनाभराचा अवधी आहे, या काळात बदल करून नव्या चेहऱ्याला संधी द्यावी, अशी मागणी शिष्टमंडळाने केली. ‘आता आम्ही काही दिवस वाट पाहू, त्यानंतर निर्णय घेऊ’, असे गायकवाड यांनी सांगितले.
आज सकाळी भाऊसाहेब वाकचौरे यांना उमेदवारी जाहीर होताच काँग्रेसच्या उत्कर्षा रूपवते यांनी आपल्या सोशल मीडिया हॅन्डलवरुन काँग्रेसचे चिन्ह व महाविकास आघाडीच्या नेत्यांचे बॅनर हटवले आहे. ‘एकच ध्यास, शिर्डी लोकसभेचा विकास’ अशी घोषणा त्यांनी सोशल मीडियातून दिली आहे. शिर्डीची जागा काँग्रेसला मिळाल्यास रुपवते निवडणूक लढविण्याच्या तयारीत होत्या. उमेदवारी अर्ज दाखल करण्यासाठी आणखी महिनाभराचा कालवधी आहे. त्यामुळे या काळात आणखी काही घडामोडींची शक्यता आहे.
Post a Comment