खळबळजनक ...! पाच लाख दे नाही तर जेलमध्ये टाकीन

पारनेर पोलिस निरीक्षकांची धमकी! / जिल्हा अधिक्षकांकडे तक्रार

माय नगर वेब टीम

पारनेर - न्यायालयाच्या आदेशाविरुद्ध जाऊन जमिनीच्या वादातून एकाने खंडणीची खोटी फिर्याद दिली, मात्र त्यानंतर खुद्द पोलिस निरीक्षकांनीच आरोपीला पाच लाख रुपयांची मागणी करुन पत्नी व मुलाला अटक करण्याची धमकी दिली. पैसे न दिल्याने पारनेर पोलिस ठाण्याचे निरीक्षक बाजीराव पोवार यांनी गुन्हा दाखल केल्याचा खळबळजनक दावा करण्यात आला आहे. याबाबत बाळासाहेब माळी यांनी जिल्हा पोलिस अधीक्षकांकडे निवेदन देऊन कारवाईची मागणी केली आहे. त्यामुळे कर्तव्यदक्ष पोलिस अधिक्षक ईशू सिंधू याप्रकरणी काय कारवाई करणार याकडे सर्वांचे लक्ष लागले आहे.

पोलिस अधिक्षकांकडे दिलेल्या निवेदनात म्हटले आहे की, पारनेर तालुक्यातील वनकुटे येथील 18 एकर शेतजमिनीबाबत न्यायालयात दावा सुरू असताना व न्यायालयीन स्थगिती असताना रोहिदास भास्कर देशमुख याने पोलिसांत बाळासाहेब माळी व इतर चार जणांविरूध्द खोटी तक्रार दिली. देशमुख याला या मिळकत क्षेत्रात न्यायालयाने निरंतर मनाई केलेली असताना न्यायालयाचा अवमान करून तक्रार दिली. याप्रकरणी माळी यांना पोलिसांनी बोलावून खंडणी व दरोड्याच्या गुन्ह्यात पत्नी व मुलांना अटक करण्याची धमकी देऊन कारवाई टाळण्यासाठी 5 लाख रूपयांची मागणी केली. गुन्हा दाखल होण्याअगोदर पोलिसांनी माळी यांच्या खिशातील 25 हजार रूपये काढून घेऊन दोन दिवस पोलिस ठाण्यात डांबून ठेवले. जाणीवपूर्वक अर्वाच्य भाषेत जातीवाचक शिवीगाळ केली. या खोट्या गुन्ह्यात फिर्यादीबरोबर तडजोड करून देतो मी मध्यस्थी करतो, असे पोलिस निरीक्षक बाजीराव पोवार म्हणाले. लाचलुचपत प्रतिबंधक विभागाकडे तक्रार केल्यास गावातून धिंड काढेन अशी धमकी दिली, असे निवेदनात म्हटले आहे. न्यायप्रविष्ठ दिवाणी बाबींमध्ये न्यायालयाची निरंतर स्थगिती असताना व तक्रारदार देशमुख यास जमिनीत येण्यास बंदी असताना न्यायालयाचा अवमान करून खंडणी व दरोड्याचा खोटा गुन्हा दाखल केला. जाणीवपूर्वक त्रास देणार्‍या पोलिस निरीक्षक पोवार यांच्यावर कारवाई करून विभागीय चौकशीची मागणी माळी यांनी निवेदनाद्वारे केली आहे.

पोवार यांचे कृत्य मोबाईलमध्ये रेकॉर्ड
खोट्या गुन्ह्यात गुन्हे दाखल झालेल्या बाळासाहेब माळी व इतर चौघांना पोलिस ठाण्यात बोलावून सदरचा खोटा गुन्हा मिटविण्यासाठी मी तडजोड करून देतो. तुम्ही तडजोड करून घ्या मी मध्यस्थी आहे, असे निरीक्षक पोवार यांचे म्हणणे मोबाईलमध्ये रेकॉर्ड असल्याचे निवेदनात म्हटले आहे. उर्वरित 4 लाख 75 हजार दिले नाही म्हणून खोटा गुन्हा दाखल करणार्‍या निरीक्षक पोवार यांच्यावर कारवाईची मागणी केली आहे.