कारखान्यांपेक्षा दुष्काळाकडे लक्ष द्या!; बैलगाड्यांसह इंडिया आघाडीचा सरकारविरोधात धडक मोर्चा

 कारखान्यांपेक्षा दुष्काळाकडे लक्ष द्या!; बैलगाड्यांसह इंडिया आघाडीचा सरकारविरोधात धडक मोर्चा

शेतकरी, पशुधन आणि पाणीप्रश्नावर तातडीच्या उपाययोजनांची मागणी

अहिल्यानगर / नगर सह्याद्री :

   अहिल्यानगर जिल्ह्यात दुष्काळाची तीव्रता वाढत असताना शेतकरी, पशुधन आणि सर्वसामान्य नागरिकांच्या प्रश्नांकडे शासनाने गांभीर्याने लक्ष देण्याची मागणी करत इंडिया आघाडीच्या वतीने अहिल्यानगर येथे बैलगाड्यांसह सरकारविरोधात धडक मोर्चा काढण्यात आला. कारखान्यांपेक्षा दुष्काळाकडे लक्ष द्या असा संदेश देत शेतकऱ्यांना पाणी, जनावरांना चारा आणि दुष्काळग्रस्तांना तातडीची आर्थिक मदत मिळावी, अशी मागणी मोर्चातून करण्यात आली.

           दुष्काळाच्या परिस्थितीत शेतकरी आणि पशुपालक मोठ्या संकटात सापडले आहेत. अनेक भागांत पाण्याचा प्रश्न गंभीर असून पशुधनासाठी चारा उपलब्ध होण्याबाबतही अडचणी निर्माण झाल्या आहेत. त्यामुळे शासनाने केवळ घोषणा न करता दुष्काळग्रस्त भागात प्रत्यक्ष उपाययोजना कराव्यात, अशी भूमिका इंडिया आघाडीच्या नेत्यांनी मांडली.

          मोर्चाला संबोधित करताना अंबादास दानवे यांनी सरकारच्या प्राधान्यक्रमावर प्रश्न उपस्थित केला. जिल्ह्यात मोठमोठे कारखानदार असले तरी सध्या कारखान्यांपेक्षा दुष्काळाच्या प्रश्नाकडे शासनाने प्राधान्याने लक्ष देण्याची गरज असल्याचे त्यांनी सांगितले.

       मोठ्या उद्योगांना मदत करण्यापेक्षा दुष्काळाच्या संकटात सापडलेल्या शेतकरी आणि पशुधनाला मदत करणे आवश्यक आहे. जनावरांना चारा आणि पाणी मिळणे ही तातडीची गरज असून शासनाने त्यासाठी प्रभावी उपाययोजना कराव्यात, अशी मागणी त्यांनी केली.

            दुष्काळग्रस्त शेतकऱ्यांच्या प्रश्नावर शासनाकडून घोषणा केल्या जात असल्या तरी प्रत्यक्ष मदत किती मिळत आहे, असा सवाल यावेळी उपस्थित करण्यात आला. दुष्काळाची तीव्रता लक्षात घेऊन गावागावांत पाणीपुरवठा, जनावरांसाठी चारा आणि शेतकऱ्यांना आर्थिक मदत उपलब्ध करून द्यावी, अशी मागणी करण्यात आली.

         खासदार नीलेश लंके यांनीही सरकारवर टीका करत जनतेच्या प्रश्नांकडे शासनाचे लक्ष वेधण्यासाठी मोर्चे काढावे लागत असल्याचे सांगितले. दुष्काळ, पेपरफुटी आणि एसआयआर यांसारख्या प्रश्नांवर शासनाने तातडीने निर्णय घ्यावा, अशी मागणी त्यांनी केली.

           दुष्काळाचे वास्तव अधोरेखित करण्यासाठी मोर्चात बैलगाड्यांचा मोठ्या प्रमाणावर सहभाग होता. शेतकऱ्यांच्या जीवनाशी निगडित असलेल्या बैलगाड्यांसह निघालेल्या मोर्चातून ग्रामीण भागातील दुष्काळाची परिस्थिती शासनाच्या निदर्शनास आणून देण्यात आली. दुष्काळग्रस्त भागातील नागरिकांना पिण्याचे पाणी, शेतकऱ्यांना शेतीसाठी आवश्यक मदत आणि पशुधनासाठी चारा-पाण्याची व्यवस्था तातडीने करण्यात यावी, अशी मागणी आंदोलकांनी केली.

           या मोर्चात आमदार सुनील शिंदे, प्रताप पाटील शेळके, संपतराव म्हस्के, बाळासाहेब हराळ, माधवराव लामखडे, सिताराम काकडे, योगीराज गाडे, संदीप वर्पे, राजेंद्र दळवी, किरण काळे, शिवा पाटील होळकर, संजय गारुडकर, अरुण म्हस्के, अर्जुन भालेकर, डॉ. भास्कर शिरोळे, रामेश्वर निमसे, निलेश मालपाणी, रामदास गोल्हार, जगदीश चौधरी, सचिन कोते, किरण पाटील, सचिन गुजर, दीप चव्हाण, ॲड. सुभाष लांडे, बन्सी सातपुते, प्रवीण सोनवणे, राजू आघाव, मनसेचे सचिन डफळ, योगिता राजळे, अर्चना गायकवाड, सुवर्णा धाडगे यांच्यासह इंडिया आघाडीतील विविध तालुकाध्यक्ष तसेच विविध फ्रंटल संघटनांचे अध्यक्ष उपस्थित होते. यावेळी विविध पक्षांचे पदाधिकारी आणि कार्यकर्ते मोठ्या संख्येने सहभागी झाले. सरकारविरोधात घोषणाबाजी करीत दुष्काळग्रस्त शेतकरी आणि पशुपालकांच्या मागण्यांकडे शासनाचे लक्ष वेधण्यात आले.

           दुष्काळग्रस्त भागातील पाणीटंचाई दूर करणे, जनावरांसाठी चारा उपलब्ध करून देणे, पशुधन वाचविण्यासाठी आवश्यक मदत करणे आणि शेतकऱ्यांना आर्थिक सहाय्य देणे या मागण्यांवर तातडीने कार्यवाही करण्याची मागणी करण्यात आली. घोषणा नकोत, आता प्रत्यक्ष मदत आणि निर्णय हवेत, असा संदेश देत शासनाने दुष्काळग्रस्तांच्या प्रश्नांकडे गांभीर्याने पाहिले नाही, तर आंदोलन अधिक तीव्र करण्याचा इशारा इंडिया आघाडीच्या वतीने देण्यात आला.