हिंदूंना दिवाळीचा सण जल्लोषात साजरा करू द्या – नगरसेवक योगीराज गाडे

पर्यावरणप्रेमींनी फक्त हिंदूंच्या सणाच्या वेळीच जागृत होणं चुकीचं – संतुलित विचारांची गरज

माय नगर वेब टीम

अहिल्यानगर : “पर्यावरणाचे रक्षण करणे ही प्रत्येक नागरिकाची जबाबदारी आहे. मात्र काही स्वयंघोषित पर्यावरण प्रेमी फक्त हिंदूंच्या सणांच्या वेळीच ‘पर्यावरण जागरूकते’चे दाखले देतात, हे दुर्दैवी आहे,” अशी टीका नगरसेवक योगीराज गाडे यांनी केली आहे.

दिवाळी सण जवळ येत असताना फटाक्यांमुळे होणारे प्रदूषण, धूर आणि आवाज या विषयांवर काही गट फक्त हिंदूंवर बोट ठेवतात, पण वर्षभर वाहनांचा धूर, औद्योगिक कारखाने आणि न्यू इयरच्या दिवशी होणाऱ्या फटाक्यांकडे मात्र दुर्लक्ष केलं जातं, असा सवाल गाडे यांनी उपस्थित केला.

“हिंदूंचे सण हे आनंद, परंपरा आणि संस्कृतीचे प्रतीक आहेत. दिवाळी म्हणजे प्रकाशाचा आणि सकारात्मकतेचा उत्सव आहे. आपल्या संस्कृतीला बदनाम करण्याचा प्रयत्न म्हणून प्रत्येक वर्षी फक्त दिवाळीच्या वेळीच ‘पर्यावरणाचे भान’ दाखवणं योग्य नाही,” असे गाडे म्हणाले.

ते पुढे म्हणाले की, “मी सर्व नागरिकांना आवाहन करतो —
पर्यावरणाची काळजी घ्या, पण ती सर्व धर्म आणि सर्व सणांसाठी समानपणे घ्या.
हिंदूंना त्यांच्या परंपरेप्रमाणे दिवाळीचा सण धूमधडाक्यात, जल्लोषात आणि अभिमानाने साजरा करू द्या.”

नगरसेवक गाडे यांनी सांगितले की, दिवाळी ही फक्त सण नाही, ती आपली ओळख आहे. पर्यावरणप्रेम आणि संस्कृतीप्रेम हे एकत्र नांदू शकतात, गरज आहे ती संतुलित विचारांची.