माय अहमदनगर वेब टीम
पुणे:लॉकडाऊन बाबत असलेल्या नियमांमुळे गेल्या सात महिन्यांपासून बंद असलेल्या सिंहगड ट्रेकिंगसाठी खुला करण्यात आला आहे. मात्र गडाचा घाट रस्ता बंद राहणार असून गडावरील पर्यटन, खाण्याचे स्टॉल सध्या सुरू होणार नाहीत. या संदर्भात दिवाळीनंतर निर्णय घेण्यात येईल. त्यामुळे पर्यटकांनी सिंहगडावर जाण्यासाठी गर्दी करु नये, असे आवाहन वन विभागाने केले आहे.
लॉकडाऊनचे नियम शिथिल करताना राज्य सरकारने गेल्या महिन्यात हॉटेल, रिसॉर्ट आणि कृषी पर्यटन केंद्रांना परवानगी दिली आहे. या धर्तीवर गड किल्ल्यांवर ट्रेकिंगसाठी परवानगी मिळावी, अशी मागणी अखिल महाराष्ट्र गिर्यारोहण महासंघाने जिल्हाधिकाऱ्यांकडे केली होती. त्यानंतर जिल्हाधिकाऱ्यांनी दोन दिवसांपूर्वी पुणे जिल्ह्यातील सर्व किल्ले, गड आणि कातळ कडांवरील गिर्यारोहणास परवानगी दिली आहे.
सिंहगडावर गिर्यारोहकांबरोबरच घाट रस्त्याने गडावर जाणाऱ्यांची संख्याही मोठी आहे. सुट्टीच्या दिवशी चार ते पाच हजार पर्यटक गडावर भटकंती आणि जेवणासाठी जातात. दिवाळीच्या सुट्ट्यांमध्ये गड पर्यटकांसाठी खुला केल्यास सुरक्षित अंतर नियमाचे पालन, स्वच्छता आणि गर्दीवर नियंत्रण राहणार नाही, त्यामुळे वन विभागाने सिंहगडावरील पर्यटनावर बंदी कायम ठेवण्याचा निर्णय घेतला आहे. पायवाटेने गडावर जाणाऱ्या पर्यटकांवर बंधन नाही, मात्र गडावरील खाद्य पदार्थांचे स्टॉल बंद ठेवण्यात येणार आहेत.
जिल्हाधिकाऱ्यांनी पत्रामध्ये ट्रेकिंगला परवानगी दिली आहे. त्यामुळे पर्यटक पायवाटेने, ट्रेकिंगच्या मार्गाने आता सिंहगडावर जाऊ शकतात. पण पर्यटनाला परवनागी नाही, त्यामुळे आम्ही घाट रस्ता बंद ठेवणार आहोत. तसेच गडावरील खाद्य स्टॉललाही सध्या परवानगी देणार नाही- मयूर बोटे, विभागीय वनाधिकारी, पुणे वन विभाग
Post a Comment