माय अहमदनगर वेब टीम
अहमदनगर- शहरासह जिल्ह्यात चोरी, घरफोडी यांसह रस्तालुटीच्या घटनांमध्ये वाढ झाली असून, कायदा व सुव्यवस्थेचा प्रश्‍न निर्माण होत आहे. वाहनचोरीसह मंगळसूत्र चोरी, घरफोडी, हाणामार्‍या, खून, दरोडा अशा घटना करणार्‍या गुन्हेगारी प्रवृत्तीच्या लोकांचे धाडस वाढल्याने सर्वसामान्य जनतेस मोठा त्रास सहन करावा लागत आहे तसेच काही गुन्हेगारी प्रवृत्तीचे समाजकंटक नागरिकांना केवळ त्रास देण्याच्या उद्देशाने गंभीर स्वरुपाचे कृत्य करून नागरिकांमध्ये दहशत पसरवितात. याचेच उदाहरण म्हणजे माणिकनगर येथे राहणारे प्रतिष्ठित व्यावसायिक प्रितम गुंदेचा यांनी त्यांच्या बंगल्यासमोर रस्त्याच्या कडेला उभी केलेल्या कारच्या काचा फोडून दोन अज्ञात समाजकंटकांनी कार पेटवून दिली. ही घटना सोमवारी (दि.16) पहाटेच्या सुमारास नगर-पुणे रोड लगत असलेल्या माणिकनगर येथे घडली.
याबाबतची अधिक माहिती अशी की, येथील प्रितम विजय गुंदेचा (रा.नवल मोती बंगला, माणिकनगर) यांनी त्यांची स्वीफ्ट कार (क्र.एम. एच.12, डी.एस.2297) ही घरासमोर उभी करुन नेहमीप्रमाणे कुटुंबासह घरात झोपलेले असताना पहाटेच्या सुमारास त्यांच्या घराजवळ वॉचमनचे काम करणारे शिंदे मामा यांनी त्यांच्या बंगल्याचे दार ठोठावून त्यांना उठवले व ‘तुमची कार पेटली आहे’ असे सांगितले. यावर गुंदेचा यांनी गाडीवर पाणी मारुन आग विझवण्याचा प्रयत्न केला. पहाटेच्या सुमारास कोणीतरी अज्ञात समाजकंटकांनी त्यांच्या कारच्या काचा फोडून आत काहीतरी ज्वलनशील पदार्थ टाकून कार पेटवून दिली व तेथून ते पसार झाले. या घटनेने आजुबाजुचे लोक जागे झाले त्यांनी आरोपींचा जवळपास शोध घेतला परंतु ते मिळून आले नाही. गुंदेचा यांच्या घराजवळच राहणारे राजेश चंगेडिया यांच्या बंगल्यावर लावलेल्या सीसीटीव्ही फुटेज पाहिले असता त्यात दोन अनोळखी मुले गाडी पेटवताना दिसून आले.
याप्रकरणी कोतवाली पोलिसांनी प्रितम गुंदेचा यांच्या फिर्यादीवरुन अज्ञात समाजकंटकाविरुद्ध भारतीय दंड विधान कलम 435, 427 प्रमाणे गुन्ह्याची नोंद केली असून अधिक तपास पोलिस उपनिरीक्षक कचरे हे करीत आहेत.
Post a Comment