राज्य निवडणूक आयोगाच्या मान्यतेनुसार १७ नोव्हेंबरला होणार प्रसिद्ध
२४ नोव्हेंबरपर्यंत हरकतींसाठी मुदत : आयुक्त तथा प्रशासक यशवंत डांगे
माय नगर वेब टीम
अहिल्यानगर - राज्य निवडणूक आयोगाच्या मान्यतेनुसार आज ११ नोव्हेंबर रोजी प्रभागनिहाय आरक्षणासाठी सोडत काढण्यात आली. महानगरपालिकेच्या सभागृहात शालेय विद्यार्थ्यांच्या हस्ते चिठ्ठी काढून आरक्षण निश्चित करण्यात आल्याची माहिती आयुक्त तथा प्रशासक यशवंत डांगे यांनी दिली. आरक्षण सोडतीनंतर निकाल मान्यतेसाठी राज्य निवडणूक आयोगाकडे सादर करण्यात आला आहे. आयोगाच्या मान्यतेनुसार प्रारुप आरक्षण हरकती व सूचना मागविण्यासाठी १७ नोव्हेंबर रोजी प्रसिध्द करण्यात येणार असल्याचे त्यांनी सांगितले.
राज्य निवडणूक आयोगाच्या कार्यक्रमानुसार आरक्षण सोडतीची प्रक्रिया सुरू आहे. प्रभागनिहाय आरक्षण सोडत काढण्यात आली आहे. आयोगाच्या निर्देशानुसार व लोकसंख्येनुसार अनुसूचित जमातीसाठी एक जागा प्रभाग सातमध्ये थेट आरक्षणाद्वारे निश्चित करण्यात आली आहे. तसेच, लोकसंख्येच्या निकषानुसार अनुसूचित जातीच्या ९ जागा थेट आरक्षणाद्वारे निश्चित करण्यात आल्या होत्या. त्यातील पाच महिलांच्या जागा चिठ्ठी काढून निश्चित करण्यात आल्या. त्यानंतर नागरिकांच्या मागास प्रवर्गाच्या १८ जागांपैकी १७ जागा थेट आरक्षणाद्वारे प्रत्येक प्रभागात एक या प्रमाणे निश्चित केल्या होत्या. एक जागा चिठ्ठी काढून निश्चित करण्यात आली. त्यानंतर नागरिकांच्या मागास प्रवर्गाच्या महिलांसाठी राखीव असलेल्या ९ जागांपैकी सहा जागा थेट आरक्षणाद्वारे निश्चित झाल्या. उर्वरित तीन जागा सोडत काढून निश्चित करण्यात आल्या आहेत.
महानगरपालिकेच्या एकूण जागांपैकी सर्वसाधारण प्रवर्गाच्या ४० जागा असून यापैकी २० जागा सर्वसाधारण महिला प्रवर्गासाठी राखीव ठेवण्यात आल्या आहेत. आरक्षण सोडत पारदर्शकपणे जाहीररित्या सभागृहात काढण्यात आली. या सोडतीचे थेट प्रक्षेपणही करण्यात आले होते. राज्य निवडणूक आयोगाकडे सोडतीचा निकाल मान्यतेसाठी पाठवण्यात आला आहे. मान्यतेनंतर प्रारूप आरक्षण हरकती व सूचनांसाठी १७ नोव्हेंबर रोजी प्रसिद्ध करण्यात येणार आहे. त्यावर २४ नोव्हेंबरपर्यंत हरकती व सूचना दाखल करता येणार आहेत. प्रारुप आरक्षणावर प्राप्त झालेल्या हरकती व सूचनांवर विचार करुन २५ नोव्हेंबर ते १ डिसेंबर दरम्यान निर्णय घेऊन अंतिम आरक्षण विहित नमुन्यात शासन राजपत्रात २ डिसेंबर रोजी प्रसिद्ध करण्यात येणार असल्याचे आयुक्त तथा प्रशासक यशवंत डांगे यांनी सांगितले.
Post a Comment