माय अहमदनगर वेब टीम
अहमदनगर: मराठा आरक्षणाला स्थगिती मिळाल्याने बीड जिल्ह्यातील तरुणाने आत्महत्या केल्याचे सांगत रान पेटविण्यात आले होते. मात्र, ज्या सुसाईड नोटच्या आधारे हा दावा केला गेला, त्यातील अक्षर त्या युवकाचे नसून ती नोट बनावट असल्याचे पोलिसांना तपासात आढळून आले आहे. आता बनावट सुसाईड नोट लिहून सामाजिक शांततेचा भंग केल्याचा गुन्हा अज्ञातांविरुद्ध बीड ग्रामीण पोलिस ठाण्यात नोंदविण्यात आला आहे.
बीड जिल्ह्यातील केतुरा गावातील विवेक रहाडे (वय १८) याने घरात गळफास घेऊन आत्महत्या केली. तेथे आढळून आलेल्या चिठ्ठीत मराठा आरक्षणाला स्थगिती मिळाल्याने आत्महत्या करीत असल्याचा मजकूर लिहिण्यात आलेला होता. ही चिठ्ठी काही वेळात सोशल मीडियात व्हायरल झाली. राज्यभर यावर चर्चा सुरू झाली. अनेकांनी ट्विट करून याबद्ल संतापही व्यक्त केला. उपमुख्यमंत्री अजित पवार यांचे चिरंजीव पार्थ पवार यांनीही या विषयावर ट्वीट केले होते. यावर चिंता व्यक्त करताना त्यांनी मराठा नेत्यांवर निशाणा साधत सुप्रीम कोर्टात हस्तक्षेप याचिका दाखल करण्याचे संकेतही दिले होते. यावर उपमुख्यमंत्री पवार आणि राष्ट्रवादीचे अध्यक्ष ज्येष्ठ नेत शरद पवार यांना पत्रकारांनी विचारलेल्या उत्तरे द्यावी लागली होती.
Post a Comment