चीन : चीनमध्ये करोनाचा उद्रेक कायम आहे. करोनाचा संसर्ग झालेल्या नवीन रुग्णांच्या संख्येत घट झाली असली तरी मृतांच्या संख्येत वाढ झाली आहे. करोनामुळे रविवारी १५० जणांचा मृत्यू झाला असून मृतांची संख्या २५९२ इतकी झाली आहे. मृत झालेल्या १५० पैकी १४९ नागरिक हे हुबेई प्रातांतील असल्याची माहिती चीन राष्ट्रीय आरोग्य विभागाने दिली आहे. तर, ४०९ नवीन रुग्णांना रुग्णालयात दाखल करण्यात आले आहे. सर्वाधिक रुग्ण हुबेई प्रांतात आढळले आहेत.
दक्षिण कोरियात करोनाचा फैलाव
दक्षिण कोरियामध्ये करोनाचा संसर्ग झालेले आणखी १६१ नवीन रुग्ण आढळले आहेत. दक्षिण कोरियात आतापर्यंत ७६३ जणांना करोनाची लागण झाली आहे. चीननंतर सर्वाधिक रुग्ण दक्षिण कोरियामध्ये आढळले आहेत. मागील काही दिवसांत दक्षिण कोरियात करोनाच्या रुग्णांत अचानक वाढ झाली आहे. दक्षिण भागातील शहर दाएगूमध्ये करोनाचा संसर्ग झालेले रुग्ण आढळले होते.
दक्षिण कोरियात रेड अलर्ट
करोनाचा संसर्ग झालेले १२९ नवीन रुग्ण दाएगू शहरातील शिंचेओंजी चर्चशी निगडीत असल्याची माहिती रोग नियंत्रण केंद्राच्यावतीने माहिती देण्यात आली आहे. कोरियात आतापर्यंत सात जणांचा मृत्यू झाला आहे. राष्ट्रपती मून जेई-इन यांनी करोना व्हायरसचे गांभीर्य लक्षात घेऊन रेड अलर्ट जारी केला. करोनाबाबत गंभीर परिस्थिती निर्माण झाली असून आगामी काही दिवस महत्त्वाचे असणार असल्याचे मून यांनी सांगितले.
Post a Comment