माय नगर वेब टीम
अहमदनगर: विधानसभा निवडणुकीचे निकाल लागायला अजून काही तास बाकी आहेत. असे असतांना अहमदनगर जिल्ह्यातील कर्जत-जामखेड मतदारसंघात राष्ट्रवादी काँग्रेसचे रोहित पवार व भाजपाचे प्रा. राम शिंदे यांच्या समर्थकांकडून विजयाचे फलक झळकले आहेत. यामुळे येथील विषय अधिकच चर्चेचा बनला आहे. मतमोजणीआधीच कर्जत-जामखेड विधानसभा मतदारसंघात राष्ट्रवादीने रोहित पवार यांच्या विजयाचे फलक अगोदर लावले. त्यानंतर शिंदे समर्थकांनी लावले. त्यामुळे आश्चर्य व्यक्त केलं जात आहे.
राज्यात विधानसभा निवडणुकीचे निकाल लागल्यापासून अनेक पक्षाच्या उमेदवारांनी स्वत:चा विजय घोषित केला आहे. काहींनी तर विजयी मिरवणुका काढून तर काहींनी फटाके फोडून विजय साजरा केला आहे. राष्ट्रवादीचे कर्जत-जामखेडचे उमेदवार रोहित पवार यांच्या विजयाचे पोस्टरही कर्जतमध्ये लावण्यात आले आहे. रोहितदादा पवार याचं प्रचंड मतांनी विजय झाल्याबद्दल अभिनंदन, असा मजकूर या फलकांवर लिहिलेला आहे. या फलकावर रोहित पवार यांचा भला मोठा फोटो असून सोबत राष्ट्रवादीचे अध्यक्ष शरद पवार, माजी मंत्री अजित पवार आणि खासदार सुप्रिया सुळे यांच्यासहित राष्ट्रवादीच्या स्थानिक नेत्यांचे फोटो आहेत. कर्जत-जामखेडमध्ये ऐन मोक्याच्या ठिकाणीच हे फलक लावण्यात आल्याने रस्त्याने जाणाऱ्या येणाऱ्यांचे लक्ष वेधून घेत आहेत. याशिवाय अनेक तरुणांनी या फलकाचा व्हिडिओ शूट करून हा व्हिडिओ सोशल मीडियावरही व्हायरल केला आहे. त्यामुळे उद्या रोहित पवार खरंच जिंकणार का? अशी चर्चा स्थानिकांमध्ये रंगली आहे.
कर्जत-जामखेडमध्ये रोहित पवार यांचा सामना भाजपचे मंत्री प्रा. राम शिंदे यांच्यासोबत आहे. राष्ट्रवादी आणि भाजप या दोन्ही पक्षांनी कर्जत-जामखेडची सीट प्रतिष्ठेची केली आहे. रोहित पवारांसाठी राष्ट्रवादीचे नेते शरद पवार, अजित पवार आणि सुप्रिया सुळेंनी जाहीर सभा घेतल्या होत्या, तसेच रॅलीही काढण्यात आल्या होत्या. नेहमीच राष्ट्रीय नेत्यांवर आणि महत्त्वाच्या नेत्यांवर शरद पवार टीका करतात आणि इतरांना उल्लेखही करत नाहीत. मात्र कर्जत-जामखेडमध्ये पवारांनी थेट राम शिंदेंवरच हल्ला चढवून विधानसभा निवडणुकीनंतर या मतदारसंघात रामही उरणार नसल्याचं म्हटलं होतं. यावरून राष्ट्रवादीने ही सीट अत्यंत प्रतिष्ठेची केल्याचं मानलं जातं. त्यातच निकालाआधीच रोहित यांच्या विजयाचे फलक मतदारसंघात झळकू लागल्याने आश्चर्य व्यक्त केलं जात आहे.
दरम्यान प्रा. राम शिंदे यांच्या समर्थकांकडूनही विजयाचे बॅनर झळकू लागले आहेत. या मतदारसंघात कोण बाजी मारणार याकडे सर्वांचे लक्ष लागून आहे.
दरम्यान, या आधी पुण्यातील शिवाजी नगर विधानसभा मतदारसंघातील भाजपचे उमेदवार सिद्धार्थ शिरोळे विजयी झाल्याचा दावा करत त्यांच्या कार्यकर्त्यांनी फटाके फोडले होते. तर कागलमधील राष्ट्रवादीचे उमेदवार हसन मुश्रीफ यांनी विजयी मिरवणूक काढली होती. दापोलीतही राष्ट्रवादीचे उमेदवार संजय कदम यांनीही विजयी मिरवणूक काढून जल्लोष साजरा केला होता.
Post a Comment