शिर्डी -
राज्यातील पूरग्रस्तांच्या मदतीसाठी शिर्डीच्या साईबाबा संस्‍थान तर्फे १० कोटी रुपयांची मदत देण्यात येणार आहे, अशी माहिती संस्‍थानचे अध्‍यक्ष डॉ.सुरेश हावरे यांनी दिली.
डॉ.हावरे म्‍हणाले, राज्‍यामध्‍ये मुसळधार पावसामुळे भीषण पूर परिस्थिती निर्माण झालेली आहे. या जलप्रलयाच्‍या थैमानामुळे विशेषत: पश्चिम महाराष्‍ट्रातील कोल्‍हापूर, सांगली, सातारा या जिल्‍ह्यातील जनजीवन विस्‍कळीत झाले असून परिस्थिती अतिशय बिकट बनली आहे. यामुळे हजारो नागरिक बेघर झाले असून अनेक गावेही उध्‍वस्‍त झालेली आहेत. ही नैसर्गिक आपत्ती भीषण असून आपले राष्‍ट्रीय कर्तव्‍य समजून या पुरग्रस्‍तांसाठी १० कोटी रुपयांचा निधी देण्‍याचा निर्णय साईबाबा संस्‍थान विश्‍वस्‍त व्‍यवस्‍था, शिर्डीच्या वतीने घेण्‍यात आलेला आहे. हा निधी मुख्‍यमंत्री सहाय्यता निधीस देण्यात येणार असून संस्‍थानच्‍या वतीने परिस्थिती बघून वैद्यकीय पथक व औषधेही पाठविण्यात येणार आहेत.
राज्‍य शासन पूरग्रस्तांच्या मदतीसाठी अहोरात्र परिश्रम घेत आहे. राज्‍यात आलेली ही आपत्ती मोठी असून या आपत्तीतून बाहेर पडण्‍यासाठी साईबाबांच्‍या चरणी प्रार्थना करीत असल्‍याचे डॉ. हावरे यांनी सांगितले.
Post a Comment