हेल्थ डेस्क - लॉकडाउनमुळे जगातील कित्येक कर्मचारी वर्क फ्रॉम होम करत आहेत. सध्या देशात अनलॉक १.० सुरु आहे. असं असलं तरीही करोनाचा प्रादुर्भाव वाढत असलेल्या भागांमध्ये घरुन काम करणं अनिवार्य आहे. प्रत्येक नाण्याच्या दोन बाजू असतात. वर्क फ्रॉम होम करताना येणाऱ्या तांत्रिक आणि इतर अडचणींमुळे अनेकांना ते नकोसं झालं आहे. इतर दिवशी होणाऱ्या मंडे ब्लूजचं रुपांतर वर्क फ्रॉम होम ब्लूजमध्ये होऊ लागलं आहे.
पण, नाण्याच्या दोन बाजू असतात, हे विसरुन चालता कामा नये. सध्या घरुन काम करण्याचा कंटाळा आला असल तरीही त्याची दुसरी सकारात्मक बाजू बघा. वर्क फ्रॉम होम करताना तुम्ही कुटुंबाला जास्तीत जास्त वेळ देऊ शकता, नवनवीन गोष्टी शिकण्याचा प्रयत्न करू शकता. मुख्य म्हणजे वाहतूककोंडीपासून सुटका ही दिलासादायक बाब म्हणायला हवी. वर्क फ्रॉम होम ब्लूज घालवण्यासाठी तुम्ही सकारात्मक बाजूंचा विचार कसा करु शकता, याविषयी...
लक्ष केंद्री करण्यास मदत
करोनामुळे जनजीवन विस्कळीत झालं आहे. त्यामुळे या काळात माणसाला अनेक प्रयोग करायला भाग पडलं. वर्क फ्रॉम होम हा प्रयोग यातीलच एक म्हंटलं तर चुकीचं ठरणार नाही. पण, वर्क फ्रॉम होममुळे सतत एकाच जागी, एकाच खोलीत बांधलं गेल्यानं एकटेपणा जाणवू शकतो, असं मानसोपचारतज्ज्ञ सांगतात. माणसाचा स्पर्श आणि नातं यांची जागा इतर कुठल्याच गोष्टीनं भरून निघणं अशक्य आहे, असंही तज्ज्ञ सांगतात.
मोलाचं योगदान
ऑफिस म्हणजे फक्त काम करण्याची जागा नसून तिथे तुम्ही बंध, मैत्री त्याच सोबत विविधांगी कौशल्यं शिकत असता. तुम्हाला घडवण्यात ऑफिसचं मोलाचं योगदान आहे. वर्क फ्रॉम होम करताना भावनिक पातळी समतोल साधणं नक्कीच सोपं नाही. पण, वर्क फ्रॉम होममुळे तुम्हाला काही अंशी स्वातंत्र्य मिळालं आहे. त्याचा योग्य प्रकारे उपयोग केल्यास फायदे अनेक आहेत. शिवाय, घरुन काम करताना ऑफिससारखं आजूबाजूच्या लोकांचा त्रास होत नाही. त्यामुळे कामावर पूर्णपणे लक्ष केंद्रीत करता येऊ शकतं. एवढंच नाही तर कठीण काळात काम करता-करता तुम्हाला घरच्यांचा सहवास मिळत आहे, ही महत्त्वाची बाब आहे.
संवाद साधा
वर्क फ्रॉम होम करणं मानसिक आणि शारीरिक दृष्ट्या थकवणारं आहे. त्यात कुटुंब मोठं असेल किंवा घरात ३-१० वयोगटातील मुलं असल्यास वर्क फ्रॉम होम करणं थोडं अवघड होऊ शकतं. वर्क फ्रॉम होम असल्यामुळे वेळेचं बंधन नसल्यानं अवेळी व्हिडीओ कॉल्स, कॉन्फरन्स कॉल्स येणं या गोष्टी सांभाळणं कठीण जातं. यामुळे स्क्रीनटाइम वाढला आहे.
मुलांसोबत वेळ घालवा
त्याचसोबत शारीरिक हालचालींवर मर्यादा येतात. हे सगळं मान्य आहे. पण, दुसऱ्या गोष्टींमध्ये मन रमवण्यासाठी अनेक पर्याय उपलब्ध आहेत. थोडा वेळ तुम्ही घरच्यांशी संवाद साधू शकता. मुलांसोबत वेळ घालवू शकता. इतर दिवशी ऑफिसच्या व्यापापुढे जे-जे शक्य नाही ते-ते करु शकता. अर्थात, ऑफिसचं काम सांभाळून करू शकता.
पर्याय सोयीस्कर
सद्यस्थितीत वर्क फ्रॉम होम करणं हा एकमेव पर्याय असताना अनेकांना नव्या कार्यपद्धतीशी जुळवून घेताना कठीण जात आहे. अनेकांना माणसांच्या प्रत्यक्ष संपर्क साधून काम करण्याची सवय असते. तर काही व्यक्ती वर्क फ्रॉम होम करताना कामाची लय अचूक पकडतात. अनेक कर्मचाऱ्यांचा प्रवासाचा वेळ वाचत असल्यामुळे घरुन काम करण्याचा पर्याय सोयीस्कर वाटत असल्याचं कर्मचारी सांगतात. त्यामुळे येत्या काळात अनेक कंपन्या कायम स्वरुपी वर्क फ्रॉम होमचा पर्याय स्वीकारण्याचा निर्णय घेत आहेत. हा पर्याय काही अंशी कंपन्यांच्या फायद्याचासुद्धा आहे.
वेळापत्रक सेट
वर्क फ्रॉम होम हा पर्याय अनेकांसाठी करिअरची दिशा बदलणारा ठरला आहे. वर्क फ्रॉम होम करताना अनेकांचं एक विशिष्ट वेळापत्रक सेट झालं आहे. त्यामध्ये प्रवासाचा वेळ वाचत असल्यानं तो वेळ कुटुंबासाठी देता येतो, यामुळे अनेक कर्मचारी समाधानी आहेत.
Post a Comment