कोरोना व्हायरसवर मुख्यमंत्री उद्धव ठाकरेंच्या नेतृत्वात मंत्रिमंडळाची बैठक!
माय अहमदनगर वेब टिम
मुंबई - जगभरात थैमान घालणारा कोरोना व्हायरस आता महाराष्ट्रात पोहोचला आहे. त्यावर तातडीची उपाययोजना करण्यासाठी मुख्यमंत्री उद्धव ठाकरेंनी बुधवारी मंत्रिमंडळाची बैठक बोलावली. या बैठकीमध्ये कोरोना व्हायरसचा फैलाव कसा रोखता येईल यावर निर्णय घेतले जाणार आहेत. आरोग्य मंत्री राजेश टोपे यांनी बैठकीपूर्वीच मंत्रिमंडळात एक प्रस्ताव मांडला. त्यामध्ये गर्दी टाळण्यासाठी इंडियन प्रीमिअर लीग अर्थात आयपीएल सामने पुढे ढकलण्याची मागणी करण्यात आली आहे.
सुत्रांच्या माहितीनुसार, विधान भवनमध्ये दुपारी होणाऱ्या या बैठकीत कोरोनावर उपाययोजना करण्यासाठी निर्णय घेतले जातील. यामध्ये गर्दीचे कार्यक्रम आणि समारंभ टाळण्यावर सुद्धा निर्णय घेतला जाऊ शकतो. महाराष्ट्रात आतापर्यंत कोरोनाचे 5 रुग्ण सापडले आहेत. दुबईहून आलेल्या पुण्यातील एका पुरुष आणि एका महिलेचे सॅम्पल तपासासाठी प्रयोगशाळेत पाठवले होते. या दोघांच्या चाचण्या पॉझिटिव्ह आल्या आहेत. तर मंगळवारी त्यांच्या मुलीला आणि ड्रायव्हरला सुद्धा या रोगाची लागण झाल्याचे निष्पन्न झाले. पुणे जिल्हाधिकारी नवल किशोर राम यांनी यासंदर्भातील माहिती जारी केली. याच कुटुंबियांसोबत प्रवास करून आलेल्या एका व्यक्तीला कोरोनाची लागण झाली आहे. या सर्वच रुग्णांची प्रकृती सध्या स्थिर आहे. तसेच नागरिकांनी घाबरू नये असे आवाहन रुग्णालय प्रशासनासह राज्य सरकारच्या वतीने केले जात आहे.
Post a Comment