सुरक्षेच्या कारणास्तव अरमनाथ यात्रा स्थगित

माय नगर वेब टीम

नवी दिल्ली - 

अमरनाथ यात्रेवर दहशतवादी हल्ला होण्याची शक्यता आहे, अशी खात्रीशीर माहिती दिल्यानंतर अमरनाथ यात्रा थांबवण्यात आली आहे. सुरक्षादलांकडून अमरनाथ यात्रेकरूंवरील हल्ल्याचा कट उधळवून लावण्यात आला आहे, अशी माहिती लेफ्टनंट जनरल केजेएस ढिल्लनयांनी दिली. ते पत्रकार परिषदेत बोलत होते.

सुरक्षारक्षकांनी अमरनाथ यात्रेच्या मार्गावर हाती घेतलेल्या शोधमोहिमेदरम्यान, एका ठिकाणाहून अमेरिकन स्नायपर रायफल एम-२४ जप्त करण्यात आली आहे. काही ठिकाणी भूसुरुंग लावलेले आढळून आले, ते निकामी करण्यात आले, असे ढिल्लन यांनी सांगितले. पाकिस्तानी सैन्याकडून वारंवार काश्मीरमधील शांतता भंग करण्याचा प्रयत्न सुरू आहे. अद्यापही शोधमोहीम सुरू आहे, असेही ते म्हणाले.

आतापर्यंत पकडण्यात आलेल्या किंवा मारल्या गेलेल्या दहशतवाद्यांपैकी ८३ टक्के लष्करावर दगडफेक करणारे तरुण असल्याचे आढळून आले आहे. सुरुवातीला ५०० रुपये घेऊन तरुण मंडळी दगडफेक करतात आणि नंतर दहशतवादी होतात. त्यामुळे सर्व माता-भगिनींना आपल्या मुलांवर लक्ष ठेवण्याचे आवाहन ढिल्लन यांनी यावेळी केले.