माय नगर वेब टीम
अहमदनगर -
शहर अभियंत्यांवर बूट फेकल्याच्या प्रकरणात हजर झाल्यानंतर पोलिसांनी अटक करून न्यायालयात हजर केले असता अनिल राठोड यांना न्यायालयाने न्यायालयीन कोठडीत ठेवण्याचा आदेश दिला. त्यानंतर जामिनासाठी अर्ज केला असता न्यायालयाने जामीन अर्ज फेटाळून लावला आहे.
आरोपीचे वकील ॲडव्होकेट विश्वासराव आठरे पाटील यांनी आरोपीला पोलिस कोठडी देण्याची आवश्यकता नसल्याचा बचाव केला. दोन्ही बाजूचे म्हणणे ऐकून घेतल्यानंतर न्यायालयाने राठोड यांची रवानगी न्यायालयीन कोठडीत केली आहे.
शहर अभियंत्यांवर शिवसैनिकाने बूट फेकल्याप्रकरणी गुन्ह्यात आरोपी असलेले शिवसेना उपनेते व माजी मंत्री अनिल राठोड तोफखाना पोलिस ठाण्यात आज हजर झाले.
बोल्हेगाव रस्त्याचे रखडलेले काम सुरु करण्याच्या मागणीसाठी महापालिका आयुक्तांच्या दालनात शिवसेनेच्या वतीने आंदोलन करण्यात आले होते. यावेळी शिवसेनेच्या मदन आढाव याने शहर अभियंता विलास सोनटक्के यांच्या दिशेने बूट भिरकावला होता. या प्रकरणी अभियंता सोनटक्के यांनी तोफखाना पोलिसांत दिलेल्या फिर्यादीवरुन शिवसेना नगरसेवक, कार्यकर्त्यांसह अनिल राठोड यांच्यावरही गुन्हा दाखल करण्यात आला होता. सरकारी कामात अडथळा आणणे, अधिकार्‍यांना धमकावणे, शिविगाळ करणे आदी गुन्हे दाखल करण्यात आले होते.
न्यायालयाने आज न्यायालयीन कोठडी सुनावल्यानंतर राठोड यांच्यावतीने न्यायदंडाधिकाऱ्यांसमोर जामिनासाठी अर्ज करण्यात आला. सरकारी वकील पी. ए. कुलकर्णी यांनी सदर जामिनावर हरकत घेतली. या गुन्ह्याचा तपास होणे बाकी आहे. तसेच दाखल गुन्ह्याची सुनावणी सत्र न्यायालयात होत असल्याने या न्यायालयाला जामीन देण्याचा अधिकार नसल्याचा युक्तिवाद केला. दोन्ही बाजूचे म्हणणे ऐकून घेतल्यानंतर न्यायालयाने राठोड यांचा जामीन अर्ज फेटाळून लावला.
शिवसेना उपनेते अनिल राठोड यांचा जामीन अर्ज न्यायालयाने फेटाळल्यानंतर त्यांचा बी.पी. व शुगर वाढली आहे. त्यामुळे उपचारासाठी सिव्हिल हॉस्पिटलमध्ये दाखल करण्यात आले आहे.
Post a Comment