माय अहमदनगर वेब टीम
मुंबई - मुंबईतील मुलुंड येथील अॅपेक्स रुग्णालयात सोमवारी सायंकाळी ६.२० च्या सुमारास आग लागल्याने एकच खळबळ उडाली. प्रसंगावधान राखत रुग्णालयातील सर्व ४० रुग्णांना तातडीने जवळच्या अन्य रुग्णालयात दाखल करण्यात आले. मात्र, यापैकी एका रुग्णाचा तिथे मृत्यू झाल्याने हळहळ व्यक्त होत आहे.
मुंबईतील वीज पुरवठा सोमवारी सकाळी १० वाजता ठप्प झाला होता. दुपारी दोन वाजेपर्यंत अन्य भागांतील वीज पुरवठा पूर्ववत झाला मात्र मुलुंड, भांडुप भागात वीज पुरवठा ठप्पच होता. परिणामी या भागातील रुग्णालयांना केवळ जनरेटरचाच आधार होता. त्यात अॅपेक्स रुग्णालयातही जनरेटर सुरू करण्यात आला होता. मात्र तो बरेच तास चालवावा लागल्याने व अधिक गरम झाल्याने अनर्थ घडला. जनरेटरने पेट घेतल्याने आगीचा भडका उडाला. या माहितीला अग्निशमन दलाकडूनही दुजोरा देण्यात आला आहे.
मुलुंड पश्चिमेकडे वीणानगरमध्ये अॅपेक्स रुग्णालय असून आगीबाबत माहिती मिळताच अग्नशमन दलाचे पथक तातडीने घटनास्थळी दाखल झाले. त्यानंतर युद्धपातळीवर मदतकार्य करत सर्व रुग्णांना सुखरूपपणे बाहेर काढण्यात आले. रुग्णालयात ४० रुग्ण होते. त्या सर्वांना जवळच्या फोर्टिस, मुलुंड जंबो सेंटर आणि आस्था या तीन रुग्णालयांत हलवण्यात आले. दुसरीकडे आग अवघ्या १५ मिनिटांतच नियंत्रणात आणण्यात दलाने यश मिळवले.
दरम्यान, अॅपेक्स रुग्णालयातून जे ४० रुग्ण अन्य रुग्णालयात हलवण्यात आले होते त्यातील एका रुग्णाचा मृत्यू झाल्याने हळहळ व्यक्त करण्यात येत आहे. वीज पुरवठा खंडित झाला नसता तर ही दुर्घटना घडली नसती व संबंधित रुग्णाचे प्राण वाचू शकले असते, असेही बोलले जात आहे.
Post a Comment